Prziszeł taki dziyń że i moi siostrze zachciało sie żyniaczki. Weseli zamówiyli se na poczōntek lipca a rychtunki ruszyły pełnym szwōngiym już łońskigo roku.
Na poczōntku myślałach że możno sie oba piznyli w palice i beztuż to wszysko ale ni!
Hned obsztalowali wszysko i przed samym weselichym już żodnych starości ni mieli. Wszysko narychtowane jak trza!W kościele jak to w kościele – o mało my wszyscy hercklekotów nie dostali bo to jednak najbardzi stresujōnce momynty. Jo była świadkowom skiż tego trza było iść ku ołtorzu coby podpisać papiury. Miałach strach że sie skulna ze schodków skuli tych moich kromfleków ale poradziyłach utrzimać równowaga. Ufff…
No a po kościele już po leku. Siostra szykowno i piyknie poczosano, nazaglōndać sie nie szło. Piyrszy taniec poszeł dobrze, panna młodo sie nie wyrżła, pan młody też sie obstoł.
Do nocy harce i zabawy a o północy oczepiny, zabawa kiery kożdy chyba zno. Jodła było aż za tela, przejeść tego nie szło. A wszysko dobre, maszkeciyli wszyscy fest.
Oprócz gorzoły było moc roztomajtych alkoholi ale najzocniejszo była miodōnka, słodko gorzołka na miodze
Zawczasu dowōm proporcje – 0,5L szpirytusu, 0,5L miodu, 0,5L wody przegotowanej i cytryna. Jakby sie kiery chcioł dopytać o szczegóły to pisać!
W dziyń hyc był srogi ale w nocy sie przidarzyło i sie fajnie ochłodziyło, popadało i było czym dychać. Tańcowalimy do czwortej, uciechy było co nie miara bo muzykanty grały fajnie i zabawy były śmiyszne. Tak to żyniaczka sie fajnie udała, goście radzi i pojedzyni a państwo młodzi szczyśliwi i uśmiychnyci.
A nojlepsze przed nimi – rajza po ślubie!
at
Nie powiedziałabych, że my ni mieli żadnych starości tuż przed weselem ? Ciesza sie, że Ci sie weselicho podobało. Jak yno byda mieć zdjęcia, to od razu dom znać ?
at
Dziołchy:D tak fest po śląsku nie umiem, więc będzie normalnie;P pierwszy post przeczytałam właśnie ten, bo myślę, a o 'Bliźnioku’ będzie jak to komentarz powyżej opisuje:) no i superowo że wszytsko się udało! Miodonka pyszna sprawa, no nie?:D u mnie też była, nawet jakieś 1/3 flaszki jeszcze stoi za szybką,ale czeka na może 50-tą rocznicę:p no to buziaki dla Was Obu:) a na bloga będę wchodzić częściej :):)
at
Jak mosz miodonka to wpadomy pokosztować! ;D