„Kaj tak żyniesz zafuczano z tom sportowōm taszōm??”
„Aaaa, zaś leca na taniec!” 🙂
Lubisz tańcować? Jo fest przaja tańcowaniu i to w kaj jaki formie. Lubia skokać na imprezach, przepadōm za tanami na weselach i przaja tańcom w studiach, czy to salsa czy dancehall czy jaki latino solo. Od listopada 2014 trynuja pole dance ale ekstra nie byda teraz o tym szlabikować bo tak rychtyk to je do akrobatyka a nie żodyn taniec. Tam trza kupa siyły i wygimnastykowanio, to je ganc inkszo bajka niż tako bachata na przikład.
Co sie tyczy tańca w parze to już bywo różnie. Chopy roztomiyłe, nie obroźcie sie ale nikiedy jo nie wiym czy wy chcecie udeptać kapusta czy jednak zy mną potańczyć. To monej jo jednak prziniesa ta kapusta?
Po czym sie kapłach że taniec je fest ważnōm rzeczom do mie?
Ano jak na studiach trza było stować wczas rano w sobota żeby dostać sie na ulubione zajęcia z dancehallu i reggaetonu. Jak bez zima na wieczór pylałach pustymi mroźnymi ulicami na zajęcia z latino. Jak nabijałach se sińce i pot loł sie niemiłosiernie… a jo zawsze uśmiychnyto i rada z życio jak nigdy.
Tańcowani je dobre na kaj jaki smutki i zgryzoty!
Mosz niecherski dziyń i jeżeś zmierzło jak bąk? Chcesz poznać jakich fajnych ludzi? Szukosz pasji w życiu? Czyś je zawalato czy ni, tańcz i obejrz co sie bydzie dzioło! 🙂
Nie wiym jak Ty ale jo sie zbiyrōm i leca na zajęcia!
