Żywot w korporacyji
Tak rychtyk

Żywot w korporacyji

Dziynnie rano dzwoni budzik. Niechyntnie wyłączōm te moi dźwięki skowronków i przewracōm sie na drugi bok. Piernika, ale dyć trza stować! Ni ma co sie ociągać bo zaros sie zrobi za nieskoro i trza bydzie lecieć drap. Yyyy, kaj to sie szło do tej moji łaziynki? Doczkej, jaki to dzisio dziyń tydnia? I kaj je moja byrszta do zymbów?

Śniodani – sie zdąży lebo sie nie zdąży zjeść

W taki poniedziałek to sie na zicher nie zdąży. Trza bydzie zjeść przi biurku ale to nic, już prziwykłach. Klucze som w dwiyrzach, ufff, nie trza chledać. Fajnie mi sie przidarzyło i do roboty se chodza piechty, pół godziny szpacyru i żech je. Przichodza i odpalōm kompa. Mejle, dużo mejli… O, nastympne przichodzōm… trza iść na kawa 🙂

Żywot w korporacyji

Potym spotkani, trza by sie wykozać

Robia mondre miny i godōm jeszcze mondrzejrze duperszwnace. Jakoś poszło, szef zadowolony, monej bydzie prymia na koniec roku. Kupia se za nia zapas magnezu i melisy bo co sie nasztresuja przi tych kańtyczkach to moi.

Po spotkaniu ôbiod. Jeee, firma stawio wiync ni ma źle. Pogodōm se ze znajomkami, posłuchōm jako sie to ożrali na grillu bez weekend i wracōm do roztomiyłego biurka.

Żywot w korporacyji

Uzaś maile, uzaś kawa

Jakiś zmierzluch dzwoni z pretynsjami, kieryś dzwoni z podziękowaniami… i tak to zleci fascynujōnco szychta. Wtorek, środa, czwortek i piontek bydōm wyglōndać gynał tak samo. Nastympny tydzień bydzie taki som. I potym z tygodni zrobiōm sie miesiące i w końcu lata. Ale rychtyk??

 

2 comments

  1. 3 września 2016 at 8:42 rano

    Jeszcze excele – excelów nigdy nie za dużo! Nie wiadomo czy ktoś w ogóle na to potym zaglądo, ale raport w excelu trza mieć 😉

  2. Inkszo

    4 września 2016 at 6:07 po połedniu

    Mosz recht, co excel to excel 😀 Tabelek nigdy za moc!

Ôstŏw ôdpowiydź