Tak rychtyk

Co tu zrobić jak dycki ni mosz na nic czasu. Sztyry proste knify!

Miałach taki czas w życiu że sztyjc sie śpiychałach a i tak dycki mi tego czasu brakowało. Omajlant zagoniono, beztuż zmierzło a i tak nie szło wyrobić z czasym na to co sie chciało tak rychtyk robić. Co to za życi! Trza było to zmiynić bo wiela idzie lotać w takim pierzińskim kołowrocie. Do tych co też majom taki starości polecom pora zocnych rad.

Knif  1
Dziyń pryndzy spisz se lista tego co mosz zrobić na drugi dziyń, ewentualnie rób tako lista rano. Wyszlabikuj se wszysko nojlepszy po kolei cobyś jeszcze lepszy sie w tym pochytoł. Jak człowiek som se nie powiy jasno co mo zrobić to potym sie traci czas, rozmymło i guzik konkretnego sie zdziało. Trza mieć plan!

czasKnif 2

Niechej se kradzieje czasu. Fejsbuki, instagramy, pinteresty… Pomyś se wiela czasu nad tym spyndzosz i co takigo to wnosi do Twoigo życio. Zgaduja że moc czasu a po próżnicy no ni? Niestety, czas ucieko miyndzy palcami nad tymi darymnymi gupotami a nic z tego konkretnego ni ma.

Knif 3

Smol sztudyrowani berichtów z rana. Miarkuj, trza Ci tak rychtyk wiedzieć kożdego rańca co sie dzieje na świecie? Jak zaczynosz dziyń od obczajynio onetu to może czas na zmiana nawyków? Bydziesz zdrowszy i zaś zaoszczyńdzisz czas. A morderstwom, wojnom na świecie i głodowi raczyj nie poradzisz…

Knif 4

Jak sie człowiek śpiycho to czasym idzie trocha wiyncy zrobić ale dej pozór! Jak sie śpiychosz to pryndzy bydziesz ściorany i bydzie dziesiyńć na zygorze i bydzie Cie brało spani. Poza tym jak sie robi gibko to sie nie roz robi bele jako i potym trza poprawiać. Człowiek chledo kluczy co kajś położył i zapodzioł, nie pamiynto co zrobiył beztuż trza obcyrklować i zaś tracić czas… Jak na sia zaglondom to widza że jak robia coś wartko to mom wiyncy z tego utrapiynio niż korzyści.

Życi momy yno jedno!
Jak go bydymy jednako tracić na wartki lotani z miejsca na miejsce, załatwiani, wyrychlani, wynokwiani tego a tamtego… w końcu sie kapnymy że coś nieskoro sie zrobiyło, pyndzyjo za pasym a my nieszczyśliwi i zmorzyni życiym. Powodzynio z planowaniym i nie dej sie zagonić w tych szajbnytych czasach!

krzesło

Ôstŏw ôdpowiydź