fbpx
Zacznij dziyń od szolki wody!
Fyrlok

Zacznij dziyń od szolki wody!

Abo jeszcze lepszy – od szolki ciepłej wody. To je ganc zocny zwyk! Wyduldani wody z rana pomogo rozprawić sie z toksynami w organiźmie i je dobre na rozruszani niemrawego żołōndka po nocy.

Woda z cytrynōm pomogo oczyścić organizm, dodowo energie i polepszo trowiyni. Ku tymu dobrze działo na myślyni!
Kobitki! Achtung, achtung! Tako woda poprawio stan skóry aji idzie schudnyć jak sie omajlant pije tako woda z rana!

Oprócz wody z cytrynōm mom jeszcze inksze knify na napitki z rana, zależy na co mie humor nańdzie 🙂
 Zacznij dziyń od szolki wody!

Knif 1:

Rychtuja zemlyte mandle, ziorka banie, miód i cimt. Rano stowōm, załączōm czajnik i wrawo woda wlywōm do szolki. Zbiyrōm sie do roboty i jak woda trocha przechłodnie, dowōm łeżka miodu, po łeżce zemlytych mandli i zemlytych pestek banie. Sypna trocha cimtu i belontōm. Mmmm, ale dobre 🙂
Taki napitek zocnie rozgrzywo i dodowo energie, mo moc wartości odżywczych a ku tymu nie chce sie tak zaros jeść. Do mie nojlepszy knif coby zacznyć dziyń bo przedy mnōm szpacyr do roboty. Potym dziepro na miejscu w korpo jym śniodani. Aji jeszcze moga se długszy pospać bo wszysko już mom narychtowane na wieczór 🙂

 

Zacznij dziyń od szolki wody!

Knif 2

Tu trza yno ciymne kakao, miód i sezam. Jak kiery nie lubi tych ziorek to nie dować i tela. Wrawo woda uzaś wgichna do kubka i sie zbiyrōm. Potym jak to już je chłodniejsze, wciepuja łeżka miodu, ze dwie łeżyczki kakao i sezam. Taki miszōng fajnie pobudzo, ku tymu kakao mo kupa minerałów i witamin. O zocnych właściwościach sezamu aji teroz nie godōm bo tego je rychtyk moc.

Taki to som moi sposoby na poczōntek dnia. Polecōm kożdymu co chce zdrowo żyć 🙂 Jak staniesz, pierwyj co zjysz – napij sie!

Zacznij dziyń od szolki wody!

2 comments

  1. 8 paździyrnika 2016 at 4:03 po połedniu

    Woda z cytrynom mo super działani na nasze zakwaszone organizmy – bardzo dobrze alkalizuje.
    Nie dejcie sie zwieść kwaśnemu szmakowi – cytryna prziwraco zasadowość organizmu.

  2. Inkszo

    8 paździyrnika 2016 at 4:11 po połedniu

    Tako rzecze moja mondro siostra 🙂 Jom sie spłaco słuchać bo wiy co godo!

Ôstŏw ôdpowiydź