Weekend na Żarze
Paralotnie

Weekend na Żarze

Pomału zbliżoł sie weekend. Normalnie fest by mi sie to podobało ale teroz straszyła mie czorno wizjo siedzynio w mieście na miyszkaniu. Ostatnio stłukłach se palec w szłapce a ku tymu jakoś mie zmorzyło bez tydziyń, wiycie, stan podgorączkowy, słabość choby cwist i taki tam.

Tako lebioda zy mie była że myślałach że mie pieron trzaśnie

No i tyn pomysł weekendu w dōma, no bo przeca trza sie kurować, dować pozór na szłapa… Aż mie telepało.

Nie wytrzimałach i coby nie dostać hercklekotów zaklepałach se nocleg w Międzybrodziu na moi „nojzocniejszej” górce – na Żarze. Prognozy były dobre beztuż tym bardzi mie mierziyło że miałabych siedzieć na familokach.

W sobota rano wziōnach paralotnia i pojechałach

Trocha sie bołach czy jo tak rychtyk dom rada wrazić ta moja posiniaczono bolawo szłapka do buta trekkingowego ale na górce okozało sie że dało rady 🙂

Weekend na Żarze

Odstartowałach se z połednia i zrobiyłach cołkiym zocnego zlota, aji ze dwie zwitki nawet sie udały 😀 Warun aż do popołednia był niemrawy ale mi to tak rychtyk pasowało. Po połedniu zrobiyło sie lepszy, szło wisieć i wisieć. Ale jo już odpuściyłach, noga i lichy stan dowały sie we znaki beztuż nie chciałach już wiyncy kusić losu.

A wiela znajomków było na Żarze!

W sumie zocno sprawa przijechać i spotkać tela znajomych gymbiczek, aż człowiekowi sie robi ciepło na serduchu 🙂 Samej górki nie lubia ale musza pedzieć że jak tak przijechałach wiyncy jak po roku nieobecności to mie ganc rozczulyło to powitani.

Na wieczór my se siedli na roztomiyłym murku żarowym, kiery je takim paralotniowym symbolym tej górki.

Weekend na Żarze

Na drugi dziyń fest wioło i pryndko zrobiyło sie fest termicznie

Nawet tandymiorze odpuściyli lotani koło połednia bo na lōndowisku była biyda bezpiecznie wylōndować. Jo se na szczyńści z rana zdążyłach poćwiczyć pod górkōm zabawa z mojōm paralotniom ale jak sie zaczły windy na pora metrów do góry to se już dałach spokój. I reszta dnia laba 🙂

Tak to sie fajnie udoł weekend 🙂 Dobrze żech nie została w mieście bo i weselszy mi było i fajnie sie dzioło… Ni ma jak se dychnyć na świyżym powietrzu. 

Wpadejcie też na Żar! 🙂

Ôstŏw ôdpowiydź