Paralotnie

Jak to sie wszysko zaczło z tymi paralotniami

Piyńć lot tymu, jak jeszcze robiyłach w cołkiym inkszej firmie, kieregoś dzionka poznałach takigo kamrata co to lotoł na paralotni i godoł że mo znajomego co by móg mie wzionść na lot tandymym. Koleś był fest zajawiony wiync stwierdziyłach że to musi być blank fajno rzecz. Wiela sie nie zastanowiałach, wziynach siostra i kumpela co też chciały polecieć i my pojechały w góry. Lot mioł być na Żarze w Międzybrodziu Żywieckim. To je taki oblegane przez paralotniorzy miejsce bo je kolejka na wyrch i godajom że je fajny klimat bo jo konsek murka przy szynku, idzie se siednyć i fandzolić gupoty. Podle mie górka je o żic roztrzaść bo je nisko i ciyżko kaj odlecieć no ale w tej naszej Polsce ni ma co wybrzidzać, dobrze że w ogóle momy trocha pagórków. Nie takich jak na obrozku pod dołym ale dycki coś 🙂

paralotnia 3

Przijechałymy trocha za nieskoro i tandymiorz był kapka zmierzły ale w końcu sie usiotoł. Piyrszo poleciałach jo. Przidarzyło mi sie i cołkiym zocnie my polotali. Londowani było twarde bo chopowi sie śpiychało, dyć reszta dziołchów czekała! Jak my te sprzynta poskłodali to mi kozoł smyczyć połowa klamotów aż do kolejki. Teroz se tak myśla że byłach gupio że mu pomogłach bo to nie moja rzecz nosić chopowi jego charboły no ale już trudno. Zresztom jako sie potym okozało, bezmała tandymiorz był kabociorzym, szpyndlikorzym i chopym nierozważnym. No ale nie byda teraz go tu szkalować, lot mi sie spodoboł i fertich. Po mie poleciała kumpela a na końcu siostra. Onym sie już tak zocnie nie udało polotać no ale też były rade.

I tak fest mi sie przipodobało to lotani że na bezrok wzionach i sie zapisałach na kurs paralotniowy, zaś na tej samej górce co piyrszy roz leciałach. I tak to se loca do dzisio w roztomajtych ciekawych miejscach. Przez paralotnie poznałach moc fajnych ludzi, mom kupa przigód i jeżdża se w piykne miejsca. Nie powiym, nieroz mom strach jak sie w lufcie miele i je niespokojnie. Ale smola to, niech sie co dzieje!

About The Author

2 comments

  1. 28 czerwca 2017 at 2:04 pm

    Hej super blog, trafiłem na niego poprzez paralotnie ale i piszesz ciekawie 🙂 Pozdrawiam

    1. Inkszo

      28 czerwca 2017 at 6:31 pm

      Dzięki! W razie paralotniowych pytań może byda w stanie pomóc 🙂 Po polsku bez problemu poradza ;D

Dodaj komentarz