Roztomiyły kafyj
Fyrlok, Tak rychtyk

Roztomiyły kafyj

Jo to nie umia wytrzimać dnia bez kawy. Jedno że mi fest szmakuje aji se powoniać lubia a dwa, że jak se nie wyduldōm z rana to potym bez dziyń jeżech zbałamōncono i ciynżko mi sie rozmyśliwuje.

Kawusia, kawka, kofyj roztomiyły…

Czy wiycie że kawa sprawio, że my som radzi? Po wypiciu szolki kawy ônaczy nom sie fajnie stynżyni hormonu szczynścio. Ku tymu dziyki kawusi je myńsze ryzyko że nas niecherskość zmorzi. I to niecherskość nie bele jako bo Alzhaimer, Parkinson czy cukrzica. A blank oczywiste je, że kafyj pobudzo beztuż jak sie kiery rano ni ma mōnkter to nic yno mu kawa dać do wytrōmbiynio.

Roztomiyły kafyjA do tych co sie lubiōm zmorzić na fitnesach kofeina tyż sie sprzido bo polepszo wydajność  – długszy obstoimy i bydymy mieć lepsze wyniki od tych kierzi sie nie napiyli.

Yno trza se dać pozór

Za moc kawy też je niedobrze słepać bo wypłukuje magnez i wapń. Ôńskigo roku amerykońscy uczyni wysztudyrowali, że jak sie naroz wytrōmbi za moc, to sie robiōm problymy z koncentracjōm. Jak kiery mo starości z żołōndkiem abo wątrobōm to też se lepszy darować kafyj. No chyba że sie rozchodzi o kafyj orkiszowy – mo kupa błonnika, beztuż idzie go pić  bez starości. Polecōm!

A ci co sie bojōm hercklekotów zawczasu by musieli przepadzitość powstrzimać bo kawa przispieszo bici serca. Nieskoro tyż lepszy kafyja nie pić bo bydōm problymy coby dobrze kimać w nocy.

Roztomiyły kafyj

Piernika, na szczęści jak kiery je lebioda to momy tyż co inkszego – bonkawa! A terozki dojś fandzolynio – ida se zrobić kafyj.

6 comments

  1. Arun

    at

    Czyli, że jak się nie boja hercklekotów to moga pić?
    Charaszo:)
    ps. co to hercklekoty?

  2. Inkszo

    at

    Hercklekoty to gibki bici serca abo też poważniejszo choroba zwionzano z serduchym. Tyś ni ma lebioda to możesz kawy pić wiela wlezie 😉

  3. Babcia Dorka

    at

    Bonkawa = kawa prawdziwo.
    Kakałszale to je najlepsze na śniodani do tych co mają problemy ze żoładkiem

  4. i.

    at

    kawa je dobro na wszystko, a ja jij braknie
    to sie pije z miodym tyj
    szolka dobrego tyju
    a ku tymu czekulada
    to je nojlepsze jak ćmok przidzie
    i nie do sie iść na wander
    po tych placach na kierych nos
    jeszcze nie było

    1. at

      Jo przaja wszyskimu, i kafyju i tyjowi i czekuladzie tyż. Ale wszysko z pomyślunkiym i umiarym 🙂

  5. Refael72

    at

    Najnowsze badania wykazały, że wypłukiwanie magnezu to bujda. Owszem, kofeina wypłukuje magnez, ale kawa też zawiera magnez. I bilans jest taki, że więcej magnezy jest dostarczane niż wypłukiwane. https://youtu.be/Zq4hEReVAXg
    pozdrawiam serdecznie
    ps. ślunskie frelki som najgryfniejsze. Miołech dzioucha spod Pszczyny i do dziś żałuja, że się rozsypało. 250 km odległości zrobiło swoje.

Ôstŏw ôdpowiydź