Rajzy

Pepiki – piwo, chranulki, luz i swoboda

Z Pepikami miałach do czyniynio od starego piyrwka skiż tego że urodziyłach sie kole czeski granice. Do Ostravy jeździyło sie na szpas na Stodolnia, w Bohuminie robiylimy zakupy całom familijom a do Frydka Mistka my wybywali na zapiekano kyjza z chranulkami i tatarskom omackom. Teroz też dojś czynsto bywom za naszom czeskom granicom coby polotać na paralotni, Stodolnia to już teroz ni ma żodno frajda do mie. No i co ciekawego sie wywiedziałach o tych naszych Pepikach przi tych wszyskich małych rajzach?

W Czechach sie słepie moc piwa, to sie widzi na piyrszy rzut ślypia. Statystki podowajom że Pepiki pijom rocznie nojwiyncy piwa ze wszyskich nacyjów we świecie! Na osoba wychodzi kole 170 litrów na rok. Majom zdrowi te nasze somsiady…

W Czechach majom nojlepszo brauza ze wszyskich – Kofola. To je taki zelter podobny do coli ale myni słodki i bardzi kwaskowaty. Kofola już mo praje 60 lot beztuż zdążyła sie ganc zadomowić w Czechach. Jak żech yny je u Pepików to Kofola na orzyźwiyni to je mus! Mniam!

Pepiki som bardzi bezpruderyjni niż Poloki. W górach na dekach frele rozbierajom sie do bisynhaltra i badków, w miastach pary mamlajom sie namiętnie na ulicach a z wielkich billboardów spoziyrajom sagi frele w wyzywajoncych pozach. Już za bajtla mie zastanowiało jako to je że styknie przejechać dwajścia kilometrów na połednie i tak fest zmiynio sie krajobraz i obyczaje 😀

 Kuchnia – Pepiki to som mięsoki, ku tymu jedzom tłusto i cienżko. Jak eś je praje na diecie to ni mosz po co jechać do Czech 🙂 Przi pytaniu o szałot ku obiedzie Pepiki robiom oczy jak piyńc złotych i w nojlepszym razie dociepnom Ci ku knedliczkom pół tomaty i konsek ogórka. W kuchni czeski królujom też brambory – po naszymu zimioki. czy to knedle, placki czy roztomajte buchty – bez bramborów sie nie obydzie.

Czechy som jednom z nojbardzi ateistycznych nacyjów Europy. Kościołów u nich jak na lykarstwo a w niedziela już prawie żodyn nie loce posłuchać co też farosz mo dzisio dziwnego do podżistanio. Teroski tak je skuli historie – Karol IV, Jan Hus, oświeceni, rewolucja francusko i na końcu prezydent Masaryk – no i momy ateistyczne Czechy.

A na koniec coś o czym nojpewniyj nie wiedziołeś – w Czechach wynojdli… kostki cukru!

 A Ciebie co ciekawi u naszych somsiadów – piwoszów?

About The Author

Dodaj komentarz