Paralotniowy kurs bezpieczyństwa nad Jeziorem Halsztadzkim... Bele nie plōmpsnyć do wody!
Paralotnie, Rajzy

Paralotniowy kurs bezpieczyństwa nad Jeziorem Halsztadzkim… Bele nie plōmpsnyć do wody!

Paralotniowy kurs bezpieczyństwa chodziył za mnōm już ze dwa lata ale sztyjc coś inkszego sie porobiało i czas uciekoł. Latoś sie wziōnach za sia i noreszcie zapisałach sie na wyjazd. Padło na czesko szkoła el Speedo beztuż że majōm cołkiem dobre opinie.

Potym yny spakować sie roztropnie na rajza i jada!

A jakby kiery był dociyrny to tu szlabikuja o tym jako zaczłach moi przigody z furganiem: Jako sie to wszysko zaczło z tymi paralotniami.

Paralotniowy kurs bezpieczyństwa nad Jeziorem Halsztadzkim... Bele nie plōmpsnyć do wody!Czechy

Piyrszy dziyń my mieli teoria bo pogoda nie dopisywała i nie było co nosa wyściubiać na dwór. Na drugi dziyń my pojechali na Javorovy Vrch na podstawowe manewry typu front, klapa, huśtawka i epne uszy. Wtajemniczyni wiedzōm o co sie rozchodzi 😉
Austria

W nocy my sie przemieściyli do Austrie i zaczły sie konkrety nad wodōm. Czamu nad wodōm? Ano skuli tego, że jakby kiery sie zaplontōł w swoja paralotnia przy kierymś niecherskim manewrze i by wpod do jeziora to szło by go gibko wyłowić. Wszyjscy my mieli ze sobōm kamizelki ratunkowe w razie takigo umfala.

Paralotniowy kurs bezpieczyństwa nad Jeziorem Halsztadzkim... Bele nie plōmpsnyć do wody!Nad jeziorym ćwiczyli my spirale, jednostronne przeciągnięcia, full stalle, negatywki, klapy i fronty na speedzie no i wing overy do ochotników (w tym do mie! Super rzecz!). Moc było emocji i strachu tyż. Jezderkusie, jak ech roz za fest skrzidło przeciągła to mi sie zdało że już po mie 😀

Ale w końcu wszysko poszło dobrze i ani jo ani żodyn inkszy pilot nie plōmpsnył do wody. Łajba stoła na pogotowiu podle kraja jeziora ale na szczęści sie nie przidała i wszyjscy na sucho skończyli kurs.

Paralotniowy kurs bezpieczyństwa nad Jeziorem Halsztadzkim... Bele nie plōmpsnyć do wody!Jedyn dziyń po połedniu za fest wioło to my se poszli pozwiedzać Halstat. Znajdlimy fajne nieuczęszczane dróżki i szło se dychnyć od turystów blisko natury, tak jak nojbardzi lubia 🙂

Paralotniowy kurs bezpieczyństwa nad Jeziorem Halsztadzkim... Bele nie plōmpsnyć do wody!Paralotniowy kurs bezpieczyństwa nad Jeziorem Halsztadzkim... Bele nie plōmpsnyć do wody!Moc sie nauczyłach i ciesza sie że w końcu sie zebrałach na taki wypad. Teroz… bele do jakigo nastympnego!

Dodaj komentarz