Tak rychtyk

Lato prziszło, sebuj sie!

Na dobre zacznył sie czas urlopów, klary i laby. Jedni pojadom nad morze, drudzy w góry a jeszcze inksi nad jeziora. Je nojlepszy czas coby dać naszym szłapkom trocha luzu i niechać zandale w koncie. Szpacyry po piosku eli dreptani po trowie na zegródce – procno rzecz! Toć że trza zaglondać pod nogi coby jaki szkło sie nie wbiyło abo coby osy nie nadepnyć ale jak dosz pozór to wszysko bydzie dobrze 🙂 Obocz co ci przidzie dobrego z chodzynio po bosoku.

Masaż stóp – wpływo zocnie na organy wewnętrzne i poprawio ukrwieni. Jak mosz sztyjc zimne szłapki to lyź boso, bydziesz mieć przijemny, naturalny masaż.

Poprawa samopoczucio – poszpacyruj trocha boso to bydziesz widzieć jako sie fajnie poonaczy Twój humor 🙂

Zahartowani – zimno woda wzmacnio organizm beztuż szpacyrek krajym morza poprawi Twoja odporność.

Ćwiczyni uważności – beztuż że na stópkach momy moc połączeń nerwowych, przi łażyniu po bosoku fest czujymy nawierzchnia a to nom dostarczo dużo nowych doznań kiere som nieosiągalne jak chodzimy w szczewikach. Momy ganc inksze odczucia i beztuż noreszcie zaczynomy sie skupiać na tym co czujymy i co nom dowo bezpośredni kontakt z zolom.

Relaks – chodzyni po bosoku rozluźnio mięśnie i sprawio że luzujymy. Bele yno sie nie smykać podle pasieki z ulami 😉

Jak cie mierzi coby lotać boso po zegrodzie to choć aby popróbuj doma sebuć lacze i mieć eli tela kontaktu z zolom. Oboczysz, bydziesz rady! Jo sie zaros sebuwom i leca drap na trowa!

About The Author

One comment

  1. CE moi

    3 lipca 2017 at 8:06 pm

    Dobry przepis na ta zista. Mom drobno uwaga. Na Śląsku borówki zawsze były czerwone (borówka brusznica) a czorne, to jagody. Porzeczki po śląsku zwane są jagódkami. Te zaś mogą być: biołe, czorne i czerwone.

Dodaj komentarz