Jerona, jako sie tu cieszyć z życio?
Tak rychtyk

Jerona, jako sie tu cieszyć z życio?

Jak ludzie pytajōm sie co u Cia słyszeć i sztyjc chciałabyś pedzieć że źle. Jak uważosz że mosz wiyncy powodów do bycia niezadowolonōm niż radōm. Jak sztyjc se powtarzosz że bydziesz szczynśliwo w życiu jak yno jeszcze dostaniesz to i tamto i bydziesz mieć to i to – trza przeonaczyć to myślyni.

Co byś mioł robić coby być rady z życio? 
1. Unikej ludzi co jednako narzykajōm i som niezadowolyni. Zmierzły humor udzielo sie gibko no i na cóż psuć se dziyń przi słuchaniu utyskiwanio marudów?

2. Przestoń wynokwiać powody do samokrytyki. Jak dycki fuczysz na sia to ciynżko o dobre samopoczuci. Odpuść se, Twoi serducho, wątroba i skóra też sie ucieszōm 🙂

3. Zadbej o sia, ubier sie piyknie, umaluj, strzel se jaki fajne wele – jak człowiek je szwarny to sie i lepszy czuje. W laczach i starych lōntach jeszcze żodyn sie zocnie nie poczuł.

Jerona, jako sie tu cieszyć z życio?
4. Spełniej marzynia – dyć tak! Smol to wszysko i rób to na czym Ci dycki zależało. Niechej na chwila robota doma, tango z odkurzaczym, trzeci w tygodniu zakupy w biedronce i te pierziński nieumyte okna. Świat sie nie zawali jak to niechosz a Ty i otoczyni tak rychtyk bydziecie radzi bo bydziesz uśmiychnyto i zadowolono.

Lekcje salsy, wypad w góry, byzuch u dobrej kosmetyczki? Dali go! Zrób co yno do sia!

5. Ćwicz pozytywne myślyni – jak Ci yno piźnie i zaczniesz labiydzić, popróbuj zaros myśleć o czym fajnym. Hned wlezie Ci to w nawyk i sie kapniesz że wiyncy myślisz o dobrych niż o pierzińskich rzeczach

6. Onacz co szalonego żeby zapadło Ci w pamiyńć na długo!

7. Odpoczywej! Przemynczony człowiek to zmierzły człowiek! Sama wiym po sobie 😉

Jerona, jako sie tu cieszyć z życio?

2 comments

  1. Jacek

    at

    Super. Przypomniał mi się kolega z wojska. Ślązak. Też tak fajnie mówił 🙂
    Pozdrawiam Jacek

    1. Inkszo

      at

      A bo Ślązoki to w ogóle fajne som 😉

Ôstŏw ôdpowiydź