"Japoński wachlarz" Joanna Bator
Ksiōnżki

„Japoński wachlarz” Joanna Bator

„Japoński wachlarz” to ksiōnżka absolutnie fantastyczno! Polecōm wszyskim, nie yno pasjonatōm kultury Japonii. Jo tam sie nigdy nie interesowałach krajem Kwitnącej Wiśni ale ta ksiōnżczyna zrobiyła na mie ganc zocne wrażyni. Piyrsze co mie zachwyciyło to styl szlabikowanio pani Batorowej. Bogate słownictwo, elokwencja… Babka kupa sie narajzowała po świecie, miyszkała w roztomajtych miejscach, je mōndro i oczytano.

To wszysko skłodo sie na procny styl kiery czyto sie ze szpasym! No a potym sama Japonia – kraj ganc inakszy od tych wszyskich europejskich zakōntków… Japonia zadziwio i fascynuje!

"Japoński wachlarz" Joanna Bator

Tokio

Autorka opowiado o Tokio w kierym miyszkała, betonowej dżungli kaj nojlepszy narysować komu mapka coby umioł trefić do cylu bo w stolicy Japonii najczęściej ni ma oznaczeń ulic…

Miasto kiczu, betonu i szkła, kaj ludzie żyjōm w takij ciasnocie że trza wystawiać pralki czy szranki na szczewiki na dwór bo sie doma nie mieszczą.

"Japoński wachlarz" Joanna Bator
Karaoke na kożdym kroku, hotele miłości do par, ogromny wszechobecny kicz z Hello Kitty na czele, sztywne normy społeczne ale z drugi strony skłonności do najroztomańtszych perwersji… kupa ciekawostek, wszysko taki inksze niż to co znomy…

Roztomiyłe wiśnie…
Skoro Japonia nazywōmy krajem Kwitnącej Wiśni we wercie je spomnieć o hanami – święcie kiery polego na podziwianiu tychże kwiotków. Ludzie siedzōm pod strōmami na dekach, jedzōm, pijōm i ku tymu urządzajōm… jakże by inaczyj – karaoke. Na wieczór zapolajōm sie lampiony i zaczyno sie yozakura – podziwiani kwiotków nocą. Autorka barwnie opisuje te celebracje. Aż chciałoby sie tam być i poczuć tyn klimat!

"Japoński wachlarz" Joanna Bator
Fugu – ryba waryjotów
Co mie rozbrojyło to japoński super drogi maszkety – ryba fugu kiero je śmiertelnie trująco do czasu odpowiedni obróbki przez kuchorza kiery szkoli sie do tego latami. Ryba mo w sobie tela trucizny że może zabić naroz 30 ludzi. Japońce to sōm rychtyk  waryjoty – rocznie umiero tam w strasznych niecherskościach kole 100 ludzi po zjedzeniu ryby fugu. A zresztōm…
Godajōm że Japończycy sfachlujōm wszystko co pływie poza łodzią podwodną.

"Japoński wachlarz" Joanna BatorTak by szło bajać i bajać ale nojlepszy to wszysko przeczytać. Polecōm, polecōm, jeszcze roz polecōm. „Japoński wachlarz” to na zicher ni ma ostatnio ksiōnżka Joanny Bator kiero przeczytom. Wspaniałości literacki i super ciekawe rzeczy! Jak jeszcze ni mosz ksiōnżki na urlop to kombinuj nad Batorowym wachlarzem  🙂

Dodaj komentarz