Jako sie to wszysko zaczło z tymi paralotniami
Paralotnie

Jako sie to wszysko zaczło z tymi paralotniami

Piyńć lot tymu, jak jeszcze robiyłach w cołkiym inkszej firmie, kieregoś dzionka poznałach takigo kamrata co to lotoł na paralotni i godoł że mo znajomego co by poradziył polotać zy mnōm w tandymie.
Mój kumpel był fest zajawiony beztuż zmiarkowałach że to musi być blank fajno rzecz
Wiela nie rozmyśliwałach, wziynach siostra i kumpela co tyż chciały polecieć i my pojechały w góry.

Jako sie to wszysko zaczło z tymi paralotniamiLot mioł być na Żarze w Międzybrodziu Żywieckim

To je taki oblegane przez paralotniorzy miejsce bo je kolejka na wyrch i godajōm że je fajny klimat bo jo kōnsek murka przy szynku, idzie se zicnyć i fandzolić gupoty. Podle mie górka je o żić roztrzaść bo je nisko, mo kupa stromów i ciyżko kaj odlecieć no ale w tej naszej Polsce ni ma co wybrzidzać, dobrze że w ogóle momy trocha pagórków. Nie takich jak na łobrozku pod dołym ale dycki coś 🙂

Jako sie to wszysko zaczło z tymi paralotniamiPrzijechałymy trocha za nieskoro i tandymiōrz był kapka zmierzły ale w końcu sie usiotoł.

Piyrsze poleciałach jo. Przidarzyło mi sie i cołkiym zocnie my polotali

Lōndowani było twarde bo chop fest dziwoczył, trza było sie gibać bo przeca reszta dziołchów czekała! Jak my te sprzynta poskłodali to mi kozoł smyczyć połowa klamotów aż do kolejki.

Teroz se tak myśla że byłach gupio że mu pomogłach bo to nie moja rzecz nosić chopowi jego charboły no ale już trudno. Zresztom jako sie potym okozało, tandymiorz był kabociorzym, szpyndlikorzym i chopym nierozważnym. No ale nie byda teraz go tu szkalować, lot mi sie podoboł i fertich. Po mie poleciała kumpela a na końcu siostra. Ōnym sie już tak zocnie nie udało polotać ale też były rade.

Jako sie to wszysko zaczło z tymi paralotniamiI tak fest mi sie przipodobało to furgani że na bezrok wziōnach i sie zapisałach na kurs paralotniowy

I tak to se loca do dzisio w roztomajtych ciekawych miejscach. Skuli lotanio poznałach moc fajnych ludzi, mom kupa przigód, sztyjc coś sie dzieje i rajzuja se w piykne miejsca. Nie powiym, nieroz mom strach jak sie w lufcie miele i je niecherski warun. Ale smola to, niech sie co dzieje!

2 comments

  1. Czerwiec 2017 at 2:04 pm

    Hej super blog, trafiłem na niego poprzez paralotnie ale i piszesz ciekawie 🙂 Pozdrawiam

    1. Inkszo

      Czerwiec 2017 at 6:31 pm

      Dzięki! W razie paralotniowych pytań może byda w stanie pomóc 🙂 Po polsku bez problemu poradza ;D

Dodaj komentarz