Tak rychtyk

Jako kolory onaczom nasz humor

Jako oblyczka se kupić, modro czy lilowo? Jaki kolor farby machnyć na ścianie? A tepich bronotny eli czerwiony? Kolory majom znaczyni i onaczom nasze samopoczuci. Miarkuj:

Liliowy – idzie na piyrszy ogiń bo je moim ulubionym kolorem. Liliowy to kolor spokoju, ciszy i opaterności… ale też tajemnicy i mistycyzmu. Zocnie rozwijo kreatywność beztuż lubiom go artystyczne dusze.

Czerwiony – mój ulubiony zaros po lilowym 🙂 Pobudzo i dodowo energii, zocny kolor do tych co sie czujom zmorzyni i niecherscy. Ale dejcie pozór, za dużo czerwieni dookoło droźni i tropi po jakimś czasie. Kolor miłości, odwagi i życio – obocz logo Orkiestry Świątecznej Pomocy eli PCK.

Modry – uspokajo i relaksuje bo kojarzy sie z niebym i wodom. Co ciekawe, zniechęco do jedzynio beztuż jak chcesz stracić woga to jodej z modrych talyrzi. Modry pobudzo wyobraźnio beztuż sie sprzido ludziom co potrzebujom kreatywnego natchnienio. Chcesz co wymyślić? Legni se na łące i zaglondej na niebo 🙂

Bronotny – wiklina, zapach ziemi i kory stromów – bronotny kojarzy sie z ziemią i naturą, to je kolor bezpieczeństwa, stabilizacji i komfortu. Dobrze sie takim otaczać w doma.

Żółty – gorki, żywy i radosny kolor. Machni se jedna ściana w izbie w kierej se dycko dychniesz a bydziesz rady i pełny energii. Ku tymu to je kolor związany z intelektem – pomogo zapamiętywać, rozjaśnio myśli przez co pryndzy idzie podejmnyć decyzje.

Jo przede wszyskim fest lubia żywe, mocne kolory. Żodnych majtkowych delikatnych kolorków, zwłaszcza jak sie tyczy o lonty. A ty kiery kolor lubisz nojbardzi?

About The Author

Dodaj komentarz