Tym razym na lotani wybralimy sie w Pireneje. Jo fest przaja Hiszpanii i świynty był czas coby tam latoś noreszcie pojechać.
„Szmakuj życi bez aszwōngu”
Nocleg my obsztalowali w miasteczku Balaguer w Katalonii
Piyrszy dziyń furgalimy w Agerze, znanej paralotniowej miejscówce. Loce sie tam przede wszyskim podle długigo łańcucha górskigo ale idzie tyż robić przeskoki. Bez lato pojszodku dnia biyda tam je lotać, tak je ostro w lufcie. Ale na przełomie września i października było już ganc dobrze. A furgać tam szło aż ku nocy, ozim na zygorze a glajty eszcze w lufcie… Urok Hiszpanie 🙂
Na drugi dziyń wybralimy sie do Castejón de Sos
To już som wysoki góry beztuż ladszafty były ganc zocne. Tenenówkōm wyjechalimy na nojwyższe startowisko – Liri. W aucie dyrgotało niemiłosiernie ale jakoś poszło. A na wyrchu… Ajjj, piyknie było… Szło zocnie oczy napaść!
Oficjalne lōndowisko było kole cyntrum miasteczka, szło sie tam yny 5 minut 🙂 We spōmnianym centrum polecōm szynk la Morera – majōm cołkiym smaczne jedzyni – na ôbiod wszamałach zocne quesadillas.
Na nastympny dziyń pogoda była kapka niechersko w górach to my sie wybrali na zwiedzani okolice
Piyrsze oeowce morza w Cambrils, małej miejscowości podle Tarragony. Niestety miejsce było ganc turystyczne i cyny tyż nie podane do tych na prowincji Katalonie.
Drugo część dnia obsztalowałach jo. Pojechalimy do malućki mieściny Benabarre kaj je szumny zomeczek, klimatyczne wōnski uliczki i firmowy geszeft lokalnej wytwórni czekulady 😀 Miały być tyż roztomajte kyjzy ale jakoś my yny trefiyli na ta czekulada 😉
Na drugi dziyń uzaś pogoda była bele jako to my poszli w góry, w rejon parku narodowego d’Aiguestortes
Niestety bergbana dziyń pryndzy miała swoja ostatnio rajza w tym sezonie. Trocha my sie majtli ale nic to, na góra wybralimy sie naszym wynajentym fiatym pińcet L. Drōga była szutrowo i dojś niechersko beztuż autko ledwa zipało. Ale dozipało tam a nazot beztuż niniejszym ogłaszom Fiata 500L terenowym odkryciem roku 2017.
Zocnie my porajtowali po górach a po drodze rōncz my trefiali na stada krów. Zrobiyło sie do kupy 6 godzin chodzynio beztuż w drodze nazot zaczło sie chledani szynku na gibko bo już my mieli fest głód. Ale guzik – wszyndzi yny bocadillos (klapsznity) a kuchynia otwierajōm od 7 na wieczór. Jeronie… Ale yntlich my poradziyli dostać ciepły ôbiod w czwortym pod rzōnd szynku. Ufff, obstolimy jakoś.
Na nastympny dziyń zaś my pojechali do Ageru coby noreszcie co pofurgać. Dziyń nie był nojlepszy beztuż za wiela nie polotałach ale dwie godziny w lufcie tyż dobre.
Na ôstatni dziyń wybralimy sie do miejscówki Organya
Po drodze było trocha blokad na drogach bo Katalończyki sie burzyli prociw chajōm i ôstudom i jak to przōdzi przez palicajów nie śmieli zagłosować w swoim referendum o autonomia. Ale przejechalimy bez wiykszej starości. Kaj nie kaj ludzie sie zebrali na ulicach i wszyski szynki były zawrzyte. A ku tymu fiesta – szpile i szpasy do bajtli, malowani dzieckōm gymbiczek eli grill z wusztami tyż sie znojd. Nie zawiyrzejcie dycki berichtōm! Larmo w Barcelonie to był wyjōntek – narajzowalimy sie kupa po Katalonii omijajōnc stolica i wszyńdzi było spokojnie. A telewiyzjo jak telewizyjo – breweryje dycki znejdzie.
W Organyi fest mi sie podobało a tyż polotałach dojś zocnie. Nikaj sie nie wybrałach na przelot bo to był ostatni dziyń rajzy ale i tak było piyknie. Przi okazji szło sie naoglōndać roztomajtych akrobacyji co robiyły inksze piloty bo Organya je takōm europejskōm znanōm miejscówkōm do akro.
Rajza nazot do Polski okozała sie kapka niefortunno – Brussels Airlines straciyło nasze bambetle – czyli paralotnie
W rugzakach były tyż uprzęże, spadochrony zapasowe i cołko elektronika. Trocha sztresu sie najadłach ale na szczęści klamoty sie znejdły i na wieczór trzecigo dnia miałach nazot moigo Hooczka.
Polecom Pireneje skiż tego że je dziko, pusto a ku typu prowincjo Hiszpanii je ganc łacno. Rajzujcie kiery może!
