Dwa tydnie lotanio! Oj, dzioło sie! Tydzień drugi
Paralotnie, Rajzy

Dwa tydnie lotanio! Oj, dzioło sie! Tydzień drugi

Dzisio drugo czyńść relacje z rajzy Włochy – Słowenia – Chorwacja – Słowenia – Włochy.

Dali go! Rajzy to je fajno rzecz!

Słowenia

Z Chorwacje ruszylimy na Słowenia bo… toć że pogoda. Jeszcze w aucie pozmiynialimy plany i zamiast jechać do Krvavec w końcu decyzja padła na Lijak. Wieczne niedospani, ściorani i fest dużo godzin w aucie dały o sia znać – odpuściyłach lotani bo już byłach rychtyk tołt. Przez to goniyni pogody po Europie zrobiyła sie nom szkoła przetrwanio z tego urlopu 😀 Po połedniu na Lijaku „iberaszong” – zastała nas burza. Ale nic to, zowizo plan już był na Włochy. Jadymy dali 🙂

Dwa tydnie lotanio! Oj, dzioło sie! Tydzień drugi

Włochy

U Włochów zaczlimy od jeziora Garda. Na początku było ganc niefajnie – pierziński tłok, spaliny i brak miejsca coby kaj zostawić auto. Nieoznaczony dojazd do kolejki na góra plus ogromny wężyk ludzi do kas ganc zniechęcił do tego miejsca. Potym kolejka do wejścio i późnym popołedniym w końcu poradziylimy dostać sie na góra. Na szczęści na Monte Baldo humory sie poprawiyły – było przepiyknie! Ogłaszōm jezioro Garda nojpiykniejszym paralotniowym miejscem w kierym dotąd byłach!

Dwa tydnie lotanio! Oj, dzioło sie! Tydzień drugiLądowisko to specjalnie narychtowany skrawek zegródki podle jeziora – trocha człowiek może być wylynkany bo nad wodōm traci sie poczuci wysokości i cyrklowani trudniyj przichodzi. A przynajmniej mi nad wodōm trudniyj 😀 Ale jakoś poszło i wmanewrowałach sie na ląd. Jakiś Włoch przede mnōm ni mioł dobrego cyla, przelecioł lądowisko i skończył w wodzie. Ale na szczęści nic sie nie stało, z uśmiychym potym suszył sie na trowce 🙂

Z Malcesine przemieściylimy sie w okolice miejscowości Canal San Bovo, niedaleko Dolomitów. Zaś prawie 3 godziny w aucie i to nieskoro na wieczór… obiecalimy se że choby nie wiym co, nie bydymy sie już tela przemieszczać. Kożdy był już zajechany i trza było se odpuścić małowiela.

Dwa tydnie lotanio! Oj, dzioło sie! Tydzień drugiW okolicy noclegu znejdlimy mało uczęszczane startowisko na górce Tognola (2162m) z piyknymi widokami na Dolomity. Mało ludzi tam loce skuli wiatrów dolinowych i jebliwości w lufcie. Tego dnia było małowiela cirrusa betuż było spokojniej niż dycki i szło odstartować w środku dnia. Po lądowaniu prziszły do mie zwierzęta pasące sie na swoi łączce – mój Hooczek wydoł im sie ganc zocny 🙂

Dwa tydnie lotanio! Oj, dzioło sie! Tydzień drugiNa drugi dziyń pojechalimy do Feltre bo yny tam miała być pogoda. Spani było na kempingu Arsie nad jeziorem Corlo. Tam spędziylimy ostatni dwa dni tego szalonego urlopu 🙂 Na koniec jak my wyjyżdżali w okolicy nasunył sie frōnt beztuż wyjazd był gynał o czasie. W drodze nazot w Austrii naoglądałach sie zaś przeróżnych congestusów i kowadeł, dzioło sie na niebie… Niestabilno pogoda momy latoś, no ale cóż było robić.

Wyczerpująco to była rajza ale za to było fest ciekawie. Kapryśno pogoda dyktowała wybór miejsc i tak rychtyk z pierwotnych planów nie wyszło praktycznie nic. Alpy Centralne jeszcze muszą doczkać na eksporacjo na prziszły roz jak warun bydzie bardzi sprzyjający.

A tymczasem już sie rychtuja do nastympnej rajzy 🙂 Ale o tym kiedy indzi.

One comment

  1. Lakos z gisza :)

    Sierpień 2017 at 12:11 pm

    🙂 Kapryśno pogoda, ale furgoj i pisz 🙂

Dodaj komentarz