Tak rychtyk

Czamu nie oglondom berichtów i nie sztudyruja onetu

Co idzie obejrzeć w typowych berichtach co to omajlant nadajom w Gorolowicach? Ano na zicher jak konkubent zaciukoł swoja konkubina. Potym trzyńsiyni ziemi w Indonezji. Bydzie też o pożarze w Łodzi i przekryntach w polityce. Jak chcesz być obcykany z wypadkami drogowymi to od Macieja Orłosia usłyszysz dziynnie kiery umrzył a kiery sie obstoł ale ledwa dycho.

Dobre, to teraz onet. Jedna sebleczono frelka. Nastympno. Za chwila trzecio. Oho, Paris Hilton mo nowego bzuta w taszce. Jennifer Lopez nagrała blank nowy teledysk kaj trzyńsie swojom najdroższom żiciom świata. Jakiś leloń próbuje wcisnyć kit że idzie mu śpiywani.

berichta 2

Potym pora wieści z polityki, trocha katastrof, ożyrok pobiył drugi ożyroka i tak to sie wyłanio obrozek onetu. Na interii gynał to samo.

Piernika, nie zdzierża… Zaczłach sznupać po jakich inkszych stronach kaj idzie sie co wywiedzieć bez szarganio nerwów. Ale roncz co otworzyłach, zaloły mie wieści o wojnie, głodzie, hajach i breweryjach. Durch to samo… Dałach se spokój z tym pieroństwym bo sie poczułach ganc ściorano i zaczłach pyndym chledać wihajstra co by wyłączyć kompa 🙂

Nie chcesz dostać hercklekotów i chcesz być zdrowszy? To rałs z pierzińskimi wiadomościami! Lepszy idź kaj na szpacyr, poczytej mondro ksionżka abo zadzwoń do jakigo przijaciela. Smol berichta! 🙂

About The Author

2 comments

  1. 21 kwietnia 2017 at 6:38 am

    Zgodza sie poza jednym… co Ci wadzom te sebleczone frelki na onecie? Hercklekotow od nich nie dostana wrecz przeciwnie.

    A tak na powaznie to masz 100% racji 😉

  2. Inkszo

    21 kwietnia 2017 at 7:34 am

    Na szczęści sebleczone chłopy też sie zdarzajom beztuż do kożdego coś sie znejdzie 😉
    Z berichtami jeżech tak na bakier że jakby sie mie kiery spytom co sie teroz na świecie dzieje to nic nie wiym. Taki zy mie ignorant z premedytacjom 😉

Dodaj komentarz