Ida już ôsmo godzina, muskle pomału majōm dojś. Robi sie ćma, trza włōnczyć czołówka coby dobrze widzieć szlak. To był dobry dziyń – cołki spyndzony na świyżym lufcie i bez miejskigo larma. Mimo że nogi som bolawe, czuja sie szczęśliwo jak nigdy w żodnym inkszym miejscu.
Góry majōm we sia to magiczne coś – tam sie dycki zapomino o niecherskościach, a nojwiykszy problym to som rzeczy ganc przyziemne – chce sie jeść, pić, bolōm nogi. Czynsto słysza, że ludziōm sie podobo w górach, latoś byli piyrszy roz i na zicher bydom zaś hned jechać bo tam je cudownie! Jo je fest rada, że ludziōm sie podobo chodzić po górach. Ale ni ma żech rada tymu, co dycko o tych wypadach słysza.
I tak, na co taki początkujący góromaniōk musi dŏwać baczyni:
1. Trza sprŏwdzać prognozy
To je blank numer jedyn skuli tego, że je czynsto zaniydbywany. Rozchodzi sie o porzōndne prognozy, nie o te chmurki i słoneczka co sie wyświetlają w prostych prognozach na mobilniokach. Trza sie dobrze rozeznać w pogodzie, coby nie wpakować sie w starości. Portale kiere werci sie znać:
- TPN – podstawowo prognoza na Tatry + komunikaty, kiere TPN ciyngiym aktualizuje. Kōniecznikiym tam zajrzi jak ciśniesz w nasze roztomiyłe Tatry!
- Mountain Forecast – trocha bardzi zaawansowano prognoza z podziałym godzinowym.
- Windy – wszechstrōnny portal z roztomajtymi opcjami. Do kapka bardzi zaawansowanych ale i tak wszystkim fest polecōm!
2. Zaplanuj realistycznie swoja trasa i weź ze sobōm mapa szlaków
Jo przaja Wydawnictwu Sygnatura bo jejich mapy majōm czasy przejść i skala kiero mi pasuje. Ale kożde inksze też bydōm dobre. Nojlepszy jakby były lakowane bo wtedy som trwalsze. Czasy przejścio tyż sie sprzidowajōm, tym bardzi jak ciśniesz w niezane teryny. Nie wszyndy w górach je zasiyg beztuż mapa na papiōrze to je nojlepszo rzecz.
3. Zelter, termos z tyjym, napoje izotoniczne
Nie szporuj na piciu, odwodniyni to nic fajnego. Ku tymu miyj ze sobom roztomajte maszkety – szekulada, ôrzechy, mandle i kaj jaki ziorka – co kiery woli. Bele nie chipsy bo z tego nic dobrego ci nie przidzie 😉
4. Łoblyczka
Łoblykej sie warstwowo, a jak ci nadbydzie lōntów to wsadzisz do rukzaka i fertich. Jo fest przaja plecakōm od deutera, mom taki dwa i jeżech fest zadowolono bo som wygodne i wytrzimałe. Lata lecōm a rukzaki dali wyglondajōm dobrze – nie przeciyrajōm sie ani sie nie strzympiōm. Buty – dobrze jakby były za kostka, nie przemakały i miały porzōndno podeszwa. Kurtka trza mieć prociw wiatrowi i dyszczu.
Nie rozchodzi sie o to, coby mieć blank profesjonalne, drogi lōnty ale coby to wszysko było przemyślane i funkcjonalne. Termoaktywne łoblyczki som teroz ganc łacniejsze i dostympniejsze niż za starego piyrwka, beztuż ni ma sie co mynczyć w zwykłej bawełnie. Polecōm tyż zainwestować w porzōndne zonynbryle – brele za 10 zł od pani spod biedronki to ni ma dobro idyjŏ. O ôczy trza dbać!
5. Klamoty
Taszlampa (nojlepszy czołówka), kije – fest ulekaszajōm chodzyni, rękawiczki, czopka z daszkiym, bandanka eli jako szatka na kark. Mazidło z filtrym przido sie cołki rok. A w zima – raki i stuptuty to je mus! Choby yno w naszych niewysokich Beskidach – jak nie chcesz bezradnie zukać na swoim zocnym zadku eli złomać kostura to bez raków nie idź w zima w góry.
To taki ôgōlne, wstympne zalycynia. Góry som wspaniałe i żol tam nie bywać, ale trza mieć w tym wszystkim trocha pomyślunku. Dbej o sia, sprawdzej prognozy pogody i ubier sie stosownie do aury.
Udanego i bezpiecznego rajtowanio wszyskim życza!
