Co mo baba we kuchyni?
Tak rychtyk

Co mo baba we kuchyni?

Baby jak to baby, majōm w kuchyni moc roztomajtych klamorów a norzyńdzi

A co jedyn klamot to bardzi przidajny! Jo tam dycki wola jak je czego myni niż wiyncy ale musza pedzieć, że te sprzynta to patrzi sie mieć we kuchyni:

  • Ruła – bez ruły ani rusz 😉 Piekarok to zocno rzecz bo i ciasto idzie upiyc eli jaki miszong zapiekany narychtować.

  • Ajsszrank – drugi blank schopny sprzynt we kuchyni, czynsto nazywany tyż kilszrankiym.

  • Nudelkula – nie yno do kulanio nudli na niedzielno nudelzupa eli tyż na nieposłesznego chopa! Jaki taki gizd przilezie nieskoro w nocy nażarty jak meserszmit to nudelkula zowdy dobrze je mieć pod rykōm.

Co mo baba we kuchyni?

  • Fyrlok – sprzido sie jak trza co pobelōntać. Teroz to już wszyjscy raczyj używajōm mikserów eli blynderów ale co drzewiany fyrlok to fyrlok! A na chopa tyż sie sprzido jakby co napochoł a praje nudelkule by nie było pod rykōm.

Co mo baba we kuchyni?

  • Bakpulwer – jak sie bieresz za pieczyni ciasta a bakpulwru praje ni ma we szranku to zaros żyń do geszeftu po tytka!

  • Kocher – klamor z czasów za bajtla… Dycki trza było fest se dać pozór coby mlyko nie wykipiało! A teroz już ciyżko kaj taki kocher utrefić. Mo eszcze kiery co takigo?

  • Kelnia – mocie tyż tak, że rōncz Wom te kelnie ślatujōm z chynkli?

Co mo baba we kuchyni?

  • Biksyze śledziami, fazolami, grochym eli kaj jakimi inkszymi szpecjałami. Ale miarkuj! Dycki lepszy trzimać jedzyni w czym szklanym niż metalowym. Krauza zowdy lepszo eli aluminiowo biksa!

  • Serwet – na świynta abo geburstag taki bardzi galantny a bez tydziyń lakowany. Strokaty, we krata, kwiotka abo kaj jaki inksze wzory.

  • Efner – tu za wiela nie trza ôsprawiać. Jak flaszka je zadichtowano szpōntym to bez efnera psinco zdziałosz.

Co mo baba we kuchyni?

  • Glaski – szolki w kuchyni trza mieć, co mus to mus. Tako glaska to może mieć roztomajte zastosowania! Dycki poratuje choby yny:

– jak praje ni ma pod rękōm blumwazy,

– jak sie chce wykroć równe kółka na cieciuchy eli pierogi,

– jak sie strzaskoł ostatni kieliszek i ni ma do czego naloć wina 😉

Co eszcze mo we kuchyni ślōnsko baba?

2 comments

  1. i.

    Grudzień 2017 at 8:07 am

    asjetki to u nos z czeska terinki

    1. Grudzień 2017 at 9:25 am

      Terinka – gryfnie 🙂 Przaja tymu!

Dodaj komentarz