Ksionżki, Paralotnie

„Czekając na Duida. Śladem szeptu amazońskiego potoku” Stefan Czarniecki

Na co trza uważać na lotnisku w Kolumbii? Co Cie czeko w autobusie na bezdrożach Wenezueli? Wiela metrów miała nojwiykszo anakonda znejdzono w Ameryce Południowej? Czamu jeszcze tak tam wielbią Hugo Chaveza? Czarniecki procnie sie prziglądo latynoskij rzeczywistości i barwnie przedstawio swoi przigody na ziemi rządzonej przez latinos. Ale mało tego, ta rajza to ni ma taki bele jaki wypad za ocean. Czarniecki postanowiył dostać sie na tereny amazoński dżungle niedostępne do biołych, zamieszkane przez rdzennych Indian.

Ksionżczyna absolutnie przeciekawo. Dycki chciałach jechać do Ameryki Południowej a taki lektury jeszcze bardzi mie nakręcają. Ahhh, poczuć tyn ganc inkszy klimat, naoglądać sie inkszych ludzi, siednyć na borsztajnie i chłonyć atmosfera… Jo chyba zaros kupia jaki bilet za ocean!

Co mi sie nie podobało to dojś słaby język i styl pisanio autora. Dzieło literacki to na zicher ni ma… No i te odniesienia do religijności, ehhh… Czasym miałach też wrażyni choby Czarniecki próbowoł trocha przekoloryzować rzeczywistość coby fabuła była jeszcze bardzi porywająco no ale tuż nic to, przinajmniyj ciekawie sie czytało.

Zo wi zo polecom 🙂 Jakby sie mie kiery pytoł – drugi roz też bych przeczytała 🙂

Paralotnie, Rajzy

Majowo para-rajza w Alpy

Zocnie mi sie udała majowo rajza w Alpy. Jak to dycki, wyjazd był paralotniowy, inkszego urlopu se już nie miarkuja. Na wyjazd uzaś pojechałach z grupą Michała Gierlacha, naszego paralotniowego mistrza Polski. Większość rajzy spędzilimy we Włochach, dziepro ostatni dziyń pojechalimy na Słowenia.

Piyrszy dziyń lotalimy w Feltre. Niestety początki okozały sie do mie kapka niefortunne… Przed wyjazdem wyonaczyłach uprząż i rugzak na lekciejsze, na i cóż, okozało sie że tak lotać nie idzie… Była mocno terma i moi skrzidło roncz odstawiało jakiś cyrki. Piyrsze dostałach ogromnego fronta. Potym klapa na ¾ skrzydła. Potym uzaś mega front… Eszcze nigdy ni miałach takich niecherskości. No i trza było lądować bo to naprowda nie wyglądało dobrze. Ale sie nie zniechęciyłach, po połedniu wziynach trzi litry wody i odpolyłach eszcze roz i już było trocha lepszy. Potym już do końca rajzy lotałach z ołowiym od Spike i cztyryma litrami wody…

Mom nadzieja że nie czyto tego moja mama bo jak zaś kiedy przijada du dom to sie zacznie bezlitosne futrowani 😉

Potym my pojechali do Bassano, znanej mekki paralotniowej Europy. Tam zrobiyłach mój najdługszy przelot w cołki dotychczasowej karierze paralotniowej – 45km. Ale byłach uradowano! Ni ma to wiela do starych wyjodaczy ale że jo dziepro zaczynom przelotowe przigody to cieszyłach sie jak bajtel! Superancko 🙂

Niestety prognozy sie popsuły i jedyn dziyń musielimy odpuścić furgani. Wybralimy sie na zwiedzani interaktywnego muzeum przyrodniczego MUSE w Trydencie.

Gadziny, geologia, geografia i kapka historyje rozmieszczone na pięciu poziomach ganc wielkiego gmachu. Jak ni ma pogody to spłaco sie wybrać do tego muzeum – sztudyrowanio nigdy dojś!

A propo zwierza, takigo stwora my spotkali na jednym ze startowisk:

Na następny dzień przenieślimy sie w okolice jeziora Garda i prociw niecherskim prognozom, udało sie polotać w miejscowości Brescia. Ni ma jak niespodziewany, spontaniczny wypad na górka 🙂

W piontek lotani zaczło sie na Roncola w San Bernardo w okolicy Bergamo. Tu mi nie za bardzo poszło i padłach po 8 km. Na szczęści udało mi sie dostać na górka eszcze roz i po połedniu już wszysko lepszy działało, poleciałach 14 km i jeszcze se powisiałach na żaglu. Miodzio.

Ostatni dzień pojechalimy na Słowenia na fest znano górka Lijak. Kożdy paralotniorz jom zno bo je łatwo i przyjemno. Prognozy nie były za fest obiecujące beztuż gibko my sie wyszpeili i drap do startu. Powisiałach trocha nad startowiskiem po czym po wykręceniu podstawy postanowiłach sie wybrać na wschód. Reszta ludzi furgała na zachodzie ale koniec końców hned też do mie dołączyli. Niestety zaczło kapka padać i trza było zasztopować lot. Byłach trocha zło bo przeleciałach 19,5 km, yny 500 metrów i by mi stuknęła choć aby ta dwudziestka… no ale i tak dobrze że udało sie co pofurgać tego dnia.

Fajnie że nom warun dopisoł, żodyn ni mioł jakichś fest niecherskich przigód, wszyscy wróciylimy cali, zdrowi i radzi. Teraz eszcze trza przesztudyrować tracki z lotanio i już idzie snuć plany na nastympno paralotniowo rajza… Przaja tymu!

Paralotnie, Rajzy

Nepalski odrealnieni część 2

Dzisio byda dali łosprawiać o moi ostatni rajzie.

Atrakcji turystycznych w Nepalu jakoś nie odnotowałach, mom wrażeni że tam sie jedzie coby pochodzić po górach, lotać na paralotni abo poczuć tyn jedyny w swoim zorcie, miejscowy klimat. Oboczylimy pora miejsc turystycznych i jedyne co mi sie spodobało to był klasztor buddyjski Matepani Gumba w Pokharze. Praje my se trefiyli na zajęcia koszykówki młodych mnichów. Continue Reading…

Paralotnie, Rajzy

Algodonales 2016

Rzekna ze dwa słowa o tej moi rajzie do Hiszpanii. Fliger miałach do Malagi a stamtąd grupom my sie przeniyśli do Algodonales, malućki uroczej miejscowości przi górce z kierej idzie zocnie polotać na paralotniach. Bo toć że wypad był paralotniowy, inkszych rajzów narazie nie planuja bo se chca sezon odkuć. Powiym Wom że skuli roztomajtych starości to mało lotałach w tym roku. Za mało!

Algodonales 2016
Na połedniu Hiszpanii pod koniec października było blisko 30 stopni w dziyń. Dobrze że miałach krótki galotki 🙂 W tym momyncie trza by przesłać wyrazy współczucio do wszyskich co byli wtedy w Polsce bo z tego co wiym pogoda była u nas fest oszkliwo. Beztuż jo wola jechać kaj na jesiyń i sie jeszcze wygrzoć a lato raczyj przesiedzieć w Polsce.
 Algodonales 2016
Lotani my mieli prawie cołki tydzień, yno ostatnigo dnia za fest wioło to my pojechali se pozwiedzać miasteczko Ronda, piyknie położone na kraju wąwozu. Potym my pojechali obejrzeć malućki miasteczko co sie zwie Setenil de las Bodegas. Mało kiery o nim wiy a je blank fajniste – wszyski domki som biołe i do tego część je wykuto w skałach. Przez miasto idzie szlak – Ruta de los Pueblos Blancos – co sie tłumaczy jako droga biołych miasteczek. Jak kiery lubi sie stracić w wąskich klimatycznych uliczkach przesiąkniętych hiszpańskim klimatym to niech zaros uderzo w te strony.
 Algodonales 2016

Continue Reading…

Paralotnie

Weekend na Żarze

Pomału zbliżoł sie weekend. Normalnie fest by mi sie to podobało ale teroz straszyła mie czorno wizjo siedzynio w mieście na miyszkaniu. Ostatnio stłukłach se palec w moi szłapce a do tego jakoś mie zmorzyło bez tydziyń, wiycie, stan podgorączkowy, słabość choby cwist i taki tam. Tako lebioda zy mie była że myślałach że mie pieron trzaśnie. No i tyn pomysł weekendu na miyszkaniu, no bo przeca trza sie kurować, dować pozór na szłapa… Aż mie telepało. Nie wytrzimałach i co by nie dostać hercklekotów zaklepałach se nocleg w Międzybrodziu na moi „nojzocniejszej” górce – na Żarze. Prognozy były dobre beztuż tym bardzi mie mierziyło że miałabych siedzieć na familokach.

W sobota rano wzionach paralotnia i pojechałach. Trocha sie bołach czy jo tak rychtyk dom rada wrazić ta moja posiniaczono bolawo szłapka do buta trekkingowego ale na górce okozało sie że dało rady 🙂

Żar 03.09

Odstartowałach se z połednia i zrobiyłach cołkiym zocnego zlota, aji ze dwie zwitki nawet sie udały 😀 Warun aż do popołednia był niemrawy ale mi to tak rychtyk pasowało. Po połedniu zrobiyło sie lepszy, szło wisieć i wisieć. Ale jo już odpuściyłach, noga i lichy stan dowały sie we znaki beztuż nie chciałach już wiyncy kusić losu.

A wiela znajomków było na Żarze! W sumie zocno sprawa przijechać i spotkać tela znajomych twarzy, aż człowiekowi sie robi ciepło na serduchu 🙂 Samej górki nie lubia ale musza pedzieć że jak tak przijechałach wiyncy jak po roku nieobecności to mie ganc rozczulyło to powitani. Na wieczór my se siedli na roztomiyłym murku żarowym, kiery je takim paralotniowym symbolym tej górki.

Na drugi dziyń fest wioło i pryndko zrobiyło sie fest termicznie. Nawet tandymiorze odpuściyli lotani koło połednia bo na lądowisku była biyda bezpiecznie wylondować. Jo se na szczyńści z rana zdążyłach poćwiczyć pod górką zabawa z mojom paralotniom ale jak sie zaczły windy na pora metrów do góry to se już dałach spokój. I reszta dnia laba 🙂

Tak to sie fajnie udoł weekend 🙂 Dobrze żech nie została w mieście bo i weselszy mi było i fajnie sie dzioło… Ni ma jak se dychnyć na świyżym powietrzu. Wpadejcie też na Żar! 🙂

Żar

Paralotnie, Rajzy

Lotani na podkarpaciu – Bezmiechowa

Kaj by tu jechać na weekend za pogodom? Chciałoby sie co polotać a nie wyglondało to za dobrze ani w Beskidach ani w Tatrach. No to wybralimy sie ze znajomymi na Bezmiechowo pod Bieszczadami.

Górka je nisko, ot taki borsztajn. Ale za to startowisko je fajne – na połednie, wielki i dobrze utrzimane, bez żodnych krzy. W sobota wszysko było przegrzote od hycu i nic nie wioło, beztuż zmłociylimy se po dwa zloty i tela było. Ale za to niedziela była już zocno.

Continue Reading…

Paralotnie

Jak to sie wszysko zaczło z tymi paralotniami

Piyńć lot tymu, jak jeszcze robiyłach w cołkiym inkszej firmie, kieregoś dzionka poznałach takigo kamrata co to lotoł na paralotni i godoł że mo znajomego co by móg mie wzionść na lot tandymym. Koleś był fest zajawiony wiync stwierdziyłach że to musi być blank fajno rzecz. Wiela sie nie zastanowiałach, wziynach siostra i kumpela co też chciały polecieć i my pojechały w góry. Lot mioł być na Żarze w Międzybrodziu Żywieckim. To je taki oblegane przez paralotniorzy miejsce bo je kolejka na wyrch i godajom że je fajny klimat bo jo konsek murka przy szynku, idzie se siednyć i fandzolić gupoty. Podle mie górka je o żic roztrzaść bo je nisko i ciyżko kaj odlecieć no ale w tej naszej Polsce ni ma co wybrzidzać, dobrze że w ogóle momy trocha pagórków. Nie takich jak na obrozku pod dołym ale dycki coś 🙂

Continue Reading…